ନବରଙ୍ଗପୁର/ ରାଇଘର,୨୨। ୭(ଆପ୍ର) : ରାଇଘର ଅଞ୍ଚଳର ଜଣେ ଯୁବତୀ ଓ ତାଙ୍କ ପୁରୁଷ ବନ୍ଧୁଙ୍କ ସହ ଫଟୋ ଓ ଭିଡିଓ ଭାଇରାଲ ହେବା ପରେ ଯୁବତୀ ଜଣକ କୀଟନାଶକ ଖାଇ ଆତ୍ମହତ୍ୟା ଉଦ୍ୟମ କରିଛନ୍ତି। ଏଥିରେ ଯୁବତୀ ଜଣକ ଗୁରୁତର ହେବାରୁ ତାଙ୍କୁ ଚିକିତ୍ସା ପାଇଁ ନବରଙ୍ଗପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ସେଠାରୁ ତାଙ୍କୁ ଭୁବନେଶ୍ବର ଏମ୍ସ ସ୍ଥାନାନ୍ତର କରାଯାଇଛି। ଯୁବତୀ ଜଣକ ଵିଏସି ନର୍ସିଂ ପାଠ ପଢୁଛନ୍ତି।
ରାଇଘର ଅଞ୍ଚଳର ଜଣେ ଯୁବତୀ ଓ ତାଙ୍କ ପୁରୁଷ ବନ୍ଧୁଙ୍କ ସହ ଅନ୍ତରଙ୍ଗ ଫଟୋ ଓ ଭିଡିଓକୁ ଅନ୍ୟ ଜଣେ ଯୁବକ ସାମାଜିକ ଗଣମାଧ୍ୟମରେ ଭାଇରାଲ କରିଥିଲେ। ଏହି ଘଟଣା ପରେ ଲୋକଲଜ୍ୟା ସହି ନ ପାରି ଯୁବତୀ ଜଣକ ଆତ୍ମହତ୍ୟା ଉଦ୍ୟମ କରିଥିଲେ। ଘାସମରା କୀଟନାଶକ ଖାଇ ଯୁବତୀ ଜଣକ ଆତ୍ମହତ୍ୟା ଉଦ୍ୟମ କରିଥିଲେ। ତାଙ୍କୁ ପ୍ରଥମେ ଗୁରୁତର ଅବସ୍ଥାରେ ଉମରକୋଟ ଉପଖଣ୍ଡ ଡାକ୍ତରଖାନାରେ ପରିବାର ଲୋକ ଭର୍ତ୍ତି କରିଥିଲେ। ପରେ ଛତିଶଗଡର କୋଣ୍ଡାଗାଁ ଜିଲ୍ଲା ମୁଖ୍ୟଚିକିତ୍ସାଳୟ ପରେ ରାୟପୁର ଏକ ଘରୋଇ ଡାକ୍ତରଖାନାରେ ୪ ଦିନ ଚିକିତ୍ସା କରିଥିଲେ। ଏହା ପରେ ଡାକ୍ତର ଯୁବତୀଙ୍କୁ ଘରକୁ ନେଇ ଯିବାକୁ କହିଥିଲେ। ଶେଷରେ ପରିବାର ଲୋକ ନିରାଶ ହୋଇ ଯୁବତୀଙ୍କୁ ଘରକୁ ଫେରାଇ ଆଣିଥିଲେ । ଅନ୍ୟପକ୍ଷରେ ଜିଲ୍ଲା ପ୍ରଶାସନ ଏହା ଜାଣିବା ପରେ ଘଟଣାକୁ ଗୁରୁତ୍ବର ସହିତ ନେଇ ଗୁରୁତର ଯୁବତୀଙ୍କୁ ନବରଙ୍ଗପୁର ଜିଲ୍ଲା ମୁଖ୍ୟ ଚିକିତ୍ସାଳୟର ଆୟୁସିୟୁରେ ଭର୍ତ୍ତି କରିଥିଲେ। କିନ୍ତୁ ବିଷପାନ କରିଥିବାରୁ ଯୁବତୀଙ୍କ ଏକାଧିକ ଅଙ୍ଗ ପ୍ରଭାବିତ ହୋଇଛି । ତେଣୁ ଅଧିକ ଚିକିତ୍ସା ପାଇଁ ଭୁବନେଶ୍ଵର ଏମ୍ସକୁ ସ୍ଥାନାନ୍ତର କରାଯାଇଛି ବୋଲି ସିଡିଏମଓ ଡା.ସନ୍ତୋଷ କୁମାର ପଣ୍ଡା କହିଛନ୍ତି ।
ଅନ୍ୟପକ୍ଷରେ ପରିବାର ଲୋକେ ରାଇଘର ଥାନାରେ ଏତଲା ଦେବା ପରେ ପୁଲିସ୍ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ତେଣୁ ଅଭିଯୁକ୍ତଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମାତୃଆଶ୍ରୟ ଆଶ୍ରମର ଅଧ୍ୟକ୍ଷା କାଦମ୍ବନୀ ତ୍ରିପାଠୀ ଦାବି କରିଛନ୍ତି। ସେଭଳି ପୀଡିତାଙ୍କୁ ଆଇସିୟୁ କକ୍ଷରେ କାଦମ୍ବନୀଙ୍କ ସମେତ କଂଗ୍ରେସର ପୂର୍ବତନ ବିଧାୟକ ଭୂଜବଳ ମାଝୀ ଭେଟିଛନ୍ତି ।
